地緣政治下的投資大法：亂世，先求不輸

最近辦公室有個奇景。

過去問我們投資的，多是問「邊隻升得最快」，現在多了很多外地來的客戶，開口第一句是：「顏總，如果出事，我屋企人的錢點算？」

由中日釣魚台的口水戰，到俄烏打足三年還未停火；由年初中東的導彈互射，到中印邊境時不時推撞。原本以為最安全的地方，原來也不平靜 — 美國同加拿大為關稅反面，英倫三島，蘇格蘭、威爾斯、北愛爾蘭自己也在吵脫不脫。

世界好像突然由「地球村」變回「地球村委會吵架大會」。以前是談合作，現在是談籌碼。

為什麼衝突越來越難解？

我成日同客戶講兩件事：

第一，架吵完，錢就更難還。

全球主要國家，邊個唔係債台高築？美國國債超過35萬億，日本負債是GDP的260%，連一向被認為穩健的歐洲，都係靠借新還舊。政府無錢，但又要交代政績，最快凝聚民心的方法是什麼？就係對外強硬。歷史不斷重演，內部矛盾外移，總比自己加稅容易。

第二，以前打仗靠坦克，現在打仗靠你個錢包。

現代衝突，已經唔一定係槍炮。今日可以凍結你央行儲備，明日可以封你SWIFT，後日可以禁你晶片。俄烏戰爭後大家都上了一課：你的資產放在哪個司法管轄區，比資產本身是什麼更重要。錢，已經成為武器。

所以我成日話，衝突唔係會唔會發生，而係以咩形式，在哪裡發生。你估唔到，但一定要預咗。

牛市，人人都是股神。亂世，先要學識做烏龜。

好多客人仍然用進取思維去問：「而家買邊度樓會升」但我會反問：「如果聽日你本國貨幣跌20%，你間屋同你個戶口會點」

投資大法，在地緣政治年代，核心只有四個字：保住本金。

而最古老、最有效、但最多香港人忽略的方法，就是：雞蛋唔好放晒同一個籃，最重要係，唔好放晒同一個國家。

我唔係叫你移民，亦唔係叫你恐慌性走資。我講的是，一個家庭資產的「救生艇配置」。

將你總資產的 10-20%，合法、合規地配置在另一個政治、經濟週期完全不同的國家。

這個比例好微妙。

少過10%，叫心理安慰，真出事先發現唔夠用。你在香港有1000萬，只放20萬在新加坡，夠機票錢，但唔夠重新開始的資本。

多過30%，你自己都會焦慮，日日望住匯率、心思，變成本末倒置。

10-20%，剛好。佢有三個作用：

它是貨幣保險：你唔係沽空自己國家，你只係對沖。當你所有資產都是港幣或人民幣計價，你就係同一個貨幣綁死。當你有15%是美元、瑞郎、新加坡元資產，你個購買力就穩定的多。

有個客戶同我講得好貼切：屋企買滅火筒，唔係因為預計一定會火燭，而是因為有個滅火筒，你先瞓得安樂。

地緣政治，就是那個火頭。

所以，別再問我邊隻股票會翻倍。這個年代，最聰明的投資問題是：

「如果世界繼續吵落去，我點樣確保，無論邊個贏，我屋企人都唔會輸晒？」

先求穩，再求進。這，才是2026年真正的投資大法。